Rexistru Xeneral de Capacitación en Bable/Asturianu y en Gallego-Asturianu

20/04/2018

El Rexistru Xeneral de Capacitación ye un catálogu nel que s’inscribe al profesoráu que, axuntando les condiciones y requisitos regulaos en Decretu 39/2001, de 5 d'abril (BOPA de 18 d'abril) y la Resolución de 26 d'abril del 2001, modificada pola Resolución de 7 de xunetu del 2010 y la Resolución de 12 d’avientu del 2011, pide voluntariamente y con calter gratuitu la so incorporación al mesmu.

El Rexistru organízase en dos secciones:

  • Capacitación n’Educación Primaria
  • Capacitación n’Educación Secundaria

La inscripción nesti Rexistru Xeneral de Capacitación ye requisitu indispensable pa impartir les enseñances de bable/asturianu y de gallego-asturianu nos centros educativos d’Enseñanza
Primaria y d’Enseñanza Secundaria del Principáu d’Asturies.

Les capacitaciones algamaes al amparu del Decretu 89/1994, de 22 d’avientu, queden incorporaes automáticamente y d’oficiu al presente Rexistru Xeneral de Capacitación.


¿Cómo se pide la Capacitación?

Presentando en cualquier de los rexistros del Principáu d’Asturies la documentación que darréu s’indica: 

  • Modelu oficial de solicitú
  • Fotocopia compulsada del DNI y de la titulación académica habilitante pal accesu a places d’educación primaria y/o d’educación secundaria.
  • Certificación en bable/asturianu. Acreitación de cursos específicos: Cursos d’especialización en Llingua Asturiana (Conveniu MEC-Principáu 1988); Cursos de Llingua Asturiana pa Enseñantes.
  • (ALLA): Cursos d’Espertu en Filoloxía Asturiana (Universidá d’Uviéu); Cursos d’Especialista en Filoloxía Asturiana (Universidá d’Uviéu); Master Oficial de Formación del Profesoráu n’Educación Secundaria Obligatoria, Bachilleratu y Formación Profesional pola especialidá d’Asturianu (Universidá d’Uviéu). Anguaño namás s’imparte esti últimu.

Nun van tener que presentar certificación nenguna quien tean en posesión del títulu de Grau de Maestru n’Educación Primaria con mención en Llingua Asturiana.

  • Certificación en gallego-asturianu. Acreitación de cursos específicos: Cursos de formación del profesoráu en gallego-asturianu (Conveniu MEC-Principáu 1988); Cursos de formación del profesoráu en gallego-asturianu (Resolución de 26 de xunetu de 1994); Cursos de Capacitación en gallego-asturianu pa la Educación Primaria y pa la Educación Secundaria, Plan Rexonal de Formación en collaboración cola ALLA. Anguaño namás s’imparte esti últimu.

La Dirección Xeneral d’Ordenación Académica y Evaluación Educativa va iguar, nel plazu máximu de tres meses, la certificación acreitativa de la capacitación pidida, remitiendo per corréu certificáu la copia de la mesma y mandando la so inscripción nel Rexistru.


Más información

Contactu pa cualquier dulda o suxerencia:

Serviciu d'Ordenación Académica y Evaluación Educativa.
Plaza d’España Nº 5
33007 Oviedo/Uviéu
Teléfonu: 985 10 86 94