VIII Día de les Ciencies Asturianes

07/11/2018

VIII Día de les Ciencies Aturianes


La investigación na Universidá d’Uviéu y la tecnoloxía al serviciu de la humanidá protagonicen los actos divulgativos del Día de les Ciencies Asturianes. La Conseyería d’Educación y Cultura celebra la octava edición del Día de les Ciencies Asturianes con dos actividaes divulgatives: una conferencia del rector de la Universidá d’Uviéu, Santiago García Granda, y una charla a escolinos a cargu d’Amador Menéndez Velázquez.


Conferencia del rector de la Universidá d'Uviéu
Xueves, 8 de payares


El rector de la Universidá d'Uviéu, Santiago García Granda, va presentar la conferencia Notes sobre la investigación na Universidá d’Uviéu nel salón d'actos del Muséu Arqueolóxicu d'Asturies el próximu xueves 8 de payares a les 19:30 hores. Nella centraráse nel llabor de la institución, onde cerca de dos mil investigadores desenvuelven el 80 % de la I+D+i de la comunidá.

Santiago García Granda ye caderalgu de Química Física na Universidá d'Uviéu y completó la so formación académica na Universidá de Nijmegen (Holanda). Ye especialista en determinación estructural, cristalografía, difracción y cálculos moleculares. Ex-presidente de la European Crystallographic Association (ECA), apocayá foi escoyíu Ordinary Member del Executive Committee de la International Union of Crystallography.


Charla divulgativa a escolinos
Vienres, 9 de payares

El vienres 9 de payares, na Casa de la Cultura de La Pola Llaviana, a les 12:00 hores, van ser los escolares del conceyu los que van participar nuna charla divulgativa a cargu del científicu Amador Menéndez Velázquez, que col títulu Tecnoloxía al serviciu de la humanidá, va plantegar les posibilidaes qu'ufierta la tecnoloxía como aliada a la hora d'encarar dalgunos de los problemes y retos más importantes de la humanidá.

Esti investigador asturianu ye doctor en Química pola Universidá d'Uviéu y trabaya anguaño nel Institutu Tecnolóxicu de Materiales d'Asturies (ITMA), depués de pasar pel Conseyu Superior d'Investigaciones Científiques, el Llaboratoriu Européu de Radicación de Sincrotón, el Centru d'Investigación en Nanomateriales y Nanotecnología (CINN) y l'Institutu Tecnolóxicu de Massachusetts (MIT), onde, al pie de otros cinco profesionales, estableció'l récord mundial d'eficiencia na captura d'enerxía solar.

Llogró numberoses reconocimientos como'l Premiu Européu de Divulgación Científica (2013) o'l Premio Jovellanos de Ensayo 2017 pol so llibru Historias del futuro. La era del Homo Tecnologicus. Apocayá foi galardonáu col Premiu Nacional d'Arquitectura Avanzada .


Día Mundial de la Ciencia pa la Paz y el Desarrollu

El Día de les Ciencies Asturianes coincide cola celebración nesti mes de payares del Día Mundial de la Ciencia pa la Paz y el Desarrollu. Esta cita mundial ufierta la posibilidá d'amosar la importancia de la ciencia na vida diaria nuestra y alimentar l'alderique sobre les cuestiones científiques, averándose a la sociedá. El tema d'esti añu ye La ciencia, un derechu humanu, yá que en 2018 conmemórase'l 70.º aniversariu de la proclamación de la Declaración Universal de los Derechos Humanos.

Consejería de Educación y Cultura-Universidad de Oviedo