El II Premiu y Festival Nel Amaro avérase al teatru infantil

07/11/2018

II Premiu y Festival Nel Amaro

Una de les obres finalistes del II Festival Nel Amaro de Teatru profesional en llingua asturiana y gallego-asturianu ye’l espectáculu Hansel y Gretel.

El vienres, 9 de payares nel Teatru Filarmónica d´Uviéu a les 20.00 hores, dientro del II Premiu y Festival Nel Amaro de Teatru profesional en llingua asturiana y gallego-asturianu, Higiénico Papel Teatro va reprepresentar l’espectáculu Hansel y Gretel, d’interés especial pal públicu infantil.

La historia que se va representar trata de trés primos que depués de munchu tiempu vuelven alcontrase en casa los güelos. Ellí, nel sombráu de la casa, ente los peluches y una montonera trastos rotos, atopen los llibros que so güelu-yos lleía cuando yeren pequeños, siendo’l so favoritu el cuentu de fades, recoyíu polos hermanos Grim, Hansel y Gretel.  Magar que pasaron munchísimos años dende entós, los trés recuérdenlu perfectamente y relleéndolu van esfrutar como si entá fueran aquellos neños d’entós.

La entrada al espectáculu ye llibre.

El Premiu de Teatru Profesional Nel Amaro en llingua asturiana o gallego-asturianu convócalu la Conseyería d’Educación y Cultura per segunda vez, coles mires d’ayudar a consolidar, arriquecer y prestixar estes dos llingües nel ámbitu del arte dramáticu y nesta segunda edición ta dotáu con 6.000 euros.